श्री स्वामी समर्थ प्रकटस्थान, कर्दळीवन प्रवासवर्णन

॥ श्री स्वामी समर्थ ॥
----------------------
श्री स्वामी समर्थ प्रकटस्थान, कर्दळीवन प्रवासवर्णन
----------------------
दि.२२ जानेवारी २०१६
आज सोलापूरला जायचे होते. कारण होते दि.२३ रोजी श्री स्वामी समर्थांच्या प्रकट स्थानाकडे निघायचे होते. त्यामुळे माझी गडबड सुरू होती. सोलापूरवरून कॅलेंडर प्रिंटींग केलेले आणायचे होते. योगीचा फोनवर फोन येत होता. परंतू कॅलेंडर आणण्यासाठी पार्टीकडून पैशांची जुळवाजुळव सुरू असल्याने सायंकाळचे ४ वाजत आले तरीसुद्धा माझे सोलापूरला जाण्याची चिन्हे दिसत नव्हती. काय करावे काहीच कळेना. शेवटी स्वमींना हात जोडले आणि म्हणालो, बघा स्वामीराया, तुमच्या दर्शनासाठी येत होतो. पण पैशांची व्यवस्था होत नाही. काय करू. आता तुम्हीच काहीतरी मार्ग काढा. त्यावर सायंकाळी ४.१५ वाजता मी पुन्हा बँकेत गेलो तर अकौंटला पैसे ट्रान्स्फर झाले होते. त्या आनंदातच मी ते पैसे काढले आणि पप्पांना फोन केला. पप्पा पण खुश झाले आणि मनोमन मी स्वामींचे आभार मानले. म्हणले चला आता स्वामींच्या दर्शनाचा मार्ग मोकळा झाला. मी व पप्पा घरी आलो. बॅग भरली आणि आमच्या कारने सोलापूरकडे मार्गस्थ झालो. आमचे गाडीमध्ये बोलणे सुरू होते. पप्पा म्हणले, मी ६ वाजेपर्यंत वाट पाहणार होतो. जर कॅलेंडर आणण्यासाठी पैशांची व्यवस्था झाली नसती तरी मी तुला स्वामी दर्शनासाठी पाठविले असते. परंतू स्वामींनी सगळीच व्यवस्था केली. बोलत, गप्पा मारीत आम्ही सोलापूरला पोहोचला. तेथे योगीपण आला. कॅलेंडर गाडीमध्ये ठेवले आणि मला शाम मामाकडे सोडून पप्पा व योगी वेळापूरकडे मार्गस्थ झाले. रात्री मामी नी माझी बॅग व्यवस्थित भरली. कारण बॅग घेवूनच मला डोंगर चढायचा होता. त्यामुळे आवश्यक तेवढेच सामान बॅगमध्ये भरले आणि मी पहाट होण्याची वाट बघत राहिलो. मामा म्हणाला, ३ वाजता उठायचे आहे. बरोबर ५ वाजता निघायचे आहे. त्यामुळे मी म्हणले, आपल्याला उशीर नको म्हणून झोपण्याचा प्रयत्न करू लागलो पण स्वामींच्या दर्शनाची एवढी आस लागून राहिली होती की, काही केल्या झोपच लागेना. डोंगर कसा चढायचा? तेथील वातावरण कसे असेल? एवढा लांबचा पल्ला आपण पूर्ण करू का? या व अशा अनेक शंका मनात ठेवूनच कधी झोप लागली कळलेच नाही.

क्रमशः

कर्दळीवनाकडे जाताना

--------------------------------

औदुंबर सूर्यकांत भिसे, वेळापूर
--------------------------------